葵死葵還在！
因為家人唔捨得條玖瑰無左張床，所以又要搵過隻葵呢代替。
原先都諗住買地毯葵，等佢落沙面算數，免煩！但三月尾，係牛頭角東面海見到批新到的葵，當中有幾隻紅奶咀，即刻要左隻，$120。

雖然唔算平，但仍然化算過地毯好多，又無咁大隻阻定，所以都覺得OK。不過最滿意的，就係佢同紫點完全唔同，好肯上石！


用個兜養住先，畀塊貝殼佢就嗱嗱聲擒上去，完全唔洗煩！

網上啲ching教路，要葵落石就要用碎石砌個屎塔畀隻葵踎落去。
要砌石，所以就係阿媽信買左呢隻膠，$88(九折)。雖然都知道可以用鋼膠，但係怕自已無經驗，啲水質本身又唔係咁好，所以都唔慳呢啲錢。

砌好個馬桶就放隻葵落去，好在隻葵都肯用呢個屎坑。

雖然隻葵肯用個馬桶，但幾日後，發覺隻葵開始向後走，攝到去石罅後面，完全見唔到光，條玖瑰都埋唔到去，惟有挾硬起佢出呢再落石，但係如是者試過兩三次都係咁，惟有再度計。
決定再加多舊石，砌高啲個馬桶......

搞掂！ 隻葵終放肯坐定喇。


似乎重點係個兜要夠深，特別係「後枕」位要夠高，如果唔係，隻葵就會向後縮。

雖然落石問題解決左，但係奶咀消失同埋顏色變淡的問題就仍然無計，唔知各位有無經驗分享？加葵蝦或者葵蟹可以嗎？

葵蟹看來無必要﹐或者你可以試葵蝦啦。但既然紅奶咀已有寄主﹐無謂要住多一個房客。

唔該晒大大！ 等我再演周演周。

四月份，開缸已有七個月。當時的缸內玖瑰、峇里天使同埋火麒麟各一條。始終覺得魚太少，動感與生氣也不足夠（實情不過係姣婆守唔到寡 ），心思思又要加魚。

眼見覺得最合理要加的魚係峇里天使，因為知道呢種係群居的魚，但見佢係缸度孤零零一條友，又成日畀條玖瑰兇，所以想同佢搵翻啲伴。

不過，咁就開始左惡夢。

四月初，係阿媽信見到有批魚仔，於是要左三條，$90。

以之前兩條的經驗，見都有1／2的生存率，諗住佢都應該唔難養。我照現有一條的喂法，以蝦乾喂飼。
點知落Q兜兩星期，死淨一條 就算加埋蒜汁都唔肯開口。
再小心分析，以為係糧的問題。心諗不如試吓用其它糧，結果買左佢。唔記得FS邊間舖，總之要$46 喇。

有新糧就再試喇。
係阿媽信再買兩條，＄80。
結果.......都係一樣
原來包裝上有嗰條魚樣，都唔包保條魚一定食。

除了有美食外﹐有時還需要導師教新魚進食粒糧的。